Troch it ûngemakje fan in pear moanne lyn bin ik foar ferfanging fan in kapotte spegel oan it sykjen yn in motorsaak. Fansels sjoch ik ek efkes om my hinne wat hjir allegearre stiet oan nije motors en dêrby sjoch ik foaral by de BMW’s.
In spegel fyn ik hjoed net, BMW’s folle mear dan dat de ponge lûke kin en derom gean ik mar wer fuort. Foar de saak sjoch ik in âlder mantsje dy’t oandachtich myn motor bestudearret. “In moai masyntsje ”, sa oardielet hy en fertelt derby dat syn heit eartiids dealer fan dit merk west hat.
Wy prate noch efkes oer myn twa-takt Jawa 640 en oer it toeren yn it algemien. “Ik wachtsje noch efkes”, glundert hy as wy sa’n bytsje útpraat binne. “Ik wol ’m fansels efkes rinnen hearre.” Ik wiuw as ik fuort ryd, ik haw eins best noch wol in kreas motorke.